Fnjóská

Karfa
Karfan er tóm

Fnjóská

Lax- og silungsveiði í frábæru umhverfi

Fnjóská er 117 km að lengd, á upptök sín í Bleiksmýrardrögum og er ein vatnsmesta bergvatnsá landsins. Lax, sjóbleikja, urriði og staðbundin bleikja veiðist í Fnjóská en mest er um lax og sjóbleikju yfir veiðitímann. Veiði hefst 18. júní og stendur til 20. september og eru göngur hvað mestar um miðbik og seinnihluta júlímánaðar. Veiðistaðir í Fnjóská eru flestir stórir og víðáttumiklir og jafnt rennsli en jafnframt mikill straumur gerir ána að frábærri fluguveiðiá.

Stangaveiðifélagið Flúðir á Akureyri hefur haft Fnjóská á leigu óslitið síðan 1969.

Stangaveiðifélagið Flúðir er söluaðili fyrir Fnjóská og má finna nánari upplýsingar og fróðleik á vefsíðu félagsins, www.fnjoska.is

Fnjóská á upptök sín langt inn á hálendi en helstu veiðisvæðin renna niður Fnjóskadal austan Akureyrar frá bænum Reykjum og síðan meðfram Vaglaskógi og niður í átt að Grenivík.

Laxveiðisvæðið í Fnjóská skiptist í fjögur veiðisvæði og eru 2 stangir á hverju svæði.

1. svæði - Merktir veiðistaðir eru nr. 1 - 22, og eru þeir allir neðan við laxastigann nema veiðistaðir 18-22.
2. svæði - Merktir veiðistaðir eru nr. 23 - 38.
3. svæði - Merktir veiðistaðir eru nr. 39 - 52.
4. svæði - Merktir veiðistaðir eru nr. 53 - 68.

Veitt er á laxasvæðum frá 18. júní til 16. september.

Seldar eru stakar stangir í 2 daga í senn frá hádegi til hádegis þar sem farið er yfir öll 4 svæðin á 2 dögum. Einnig er alltaf töluvert um stakar vaktir til sölu. Athugið að ekki er leyfilegt að áframselja veiðileyfi nema með leyfi félagsins.

Veiðitími morgunvaktar er frá kl. 7 til 13 og veiðitími kvöldvaktar er frá kl. 16 til 22 til og með 10. ágúst, en eftir það frá kl. 15 til 21.

Leyfilegt er að veiða á flugu og spón á öllum svæðum frá opnun árinnar og til hádegis 11. ágúst. Frá hádegi 11. ágúst er aðeins leyft að veiða á flugu á svæðum 2-4, en áfram má veiða á flugu og spón á svæði 1, og 5, og gildir það fyrirkomulag til lokunar árinnar.

Öllum laxi sem er 70 cm eða stærri skal sleppt eða hann settur í klakkistur.

Leyfilegur hámarksafli á hverja stöng er 2 laxar og 4 bleikjur á hálfum degi. Eftir það má veiða á flugu og sleppa. Ekki eru takmörk á öðrum silungi en bleikju.

Ný veiðihús verða tekin í notkun 2016 og eru þau staðsett við Flúðasel. Veiðimenn sjá um sig sjálfir með mat, rúmföt, handklæði og þess háttar. 

Ekið er austur þjóðveg 1 frá Akureyri þangað til komið er yfir brúna neðan Vaglaskógs. Stuttu eftir að ekið er yfir brú er beygt til vinsti niður Fnjóskadal og er veiðihús um það bil 5 km frá gatnamótum á hægri hönd með skilti við afleggjara merkt Flúðum.

Alla veiði á að færa í rafræna veiðibók Fnjóskár á Veiðitorg.is. Veiðibækur síðustu ára má sjá hér.

Veiðimenn eru beðnir um að loka alltaf hliðum á eftir sér og aka ekki um tún og ótroðnar slóðir nema með leyfi landeigenda. Einnig eru veiðimenn beðnir um að sýna landeigendum og öðrum veiðimönnum tillitssemi, ganga vel um landið og skilja ekki eftir rusl við ána.

Veiðileyfi fást ekki endurgreidd. Kaupandi skuldbindur sig til að skrá alla veiði samviskusamlega í þar til gerða veiðibók.

Veiði lokið Veiðibók Skrá veiði